சிவகார்த்திகேயன் சாய்பல்லவி நடித்த அமரன் திரைப்படம் மூன்றே நாளில் நூறு கோடி ரூபாய் வசூலை எட்டி உள்ளது என தகவல் வெளியாகி உள்ளது. இதற்கு முன்னர் சிவகார்த்திகேயன் நடித்த ’டாக்டர்’ மற்றும் ’டான்’ ஆகிய படங்களும் கூட 100 கோடி ரூபாய் வசூல் எட்டியுள்ளது என்பது குறிப்பிடத்தக்கது. ஆனால் அந்த இரண்டு படங்களுக்கும் அமரன் படத்திற்கும் மிகப்பெரிய வித்தியாசம் உள்ளதாக ரசிகர்கள் சமூக வலைத்தளங்களில் பதிவு செய்து வருகின்றனர்.
சிவகார்த்திகேயன் ஜோடியாக சாய் பல்லவி நடிப்பில் ராஜ்குமார் பெரியசாமி இயக்கத்தில் கமல்ஹாசன் தயாரிப்பில் ஜி.வி. பிரகாஷ் இசையில் உருவான அமரன் திரைப்படம் ரசிகர்களுக்கு தீபாவளி விருந்தாக வெளியானது. இது மிகப்பெரிய வரவேற்பை ரசிகர்கள் மத்தியில் பெற்றுள்ளது. தீபாவளிக்கு வெளியான படங்களில் வெற்றிப் படம் அமரன் தான் என்பது உறுதி செய்யப்பட்டுள்ள நிலையில், இந்த படம் மூன்றே நாட்களில் நூறு கோடி ரூபாய் வசூல் செய்துள்ளதாக கூறப்படுகிறது.
சிவகார்த்திகேயன் நடித்த டாக்டர் திரைப்படம் 25 நாட்களில் 100 கோடி ரூபாய் வசூல் செய்த நிலையில், டான் திரைப்படம் 12 நாட்களில் 100 கோடி ரூபாய் வசூல் செய்தது. ஆனால் அமரன் திரைப்படம் வெறும் மூன்றே நாட்களில் நூறு கோடி ரூபாய் வசூல் செய்ததை அடுத்து, உண்மையாகவே அவர் தளபதி விஜய் இடத்தை பிடித்து விட்டாரோ என்று தான் எண்ண தோன்றுகிறது.
ரஜினி, கமல், விஜய், அஜித் படங்கள் மட்டுமே இவ்வளவு சீக்கிரமாக 100 கோடி ரூபாய் வசூலை தரும் நிலையில், உச்ச இடத்தை தற்போது சிவகார்த்திகேயன் அடைந்துள்ளார். இதனை அடுத்து, ரசிகர்கள் அவருக்கு வாழ்த்துக்களை தெரிவித்து வருகின்றனர்.
